Los trabajos de onomástica en Fontes Linguae Vasconum

Laburpena

Artikulu honetan Fontes-en argitara eman diren onomastika lanen berrikusketa edo errekapitulazio modukoa egin nahi izan dut. Honetarako lanak gaika sailkatu ditut lehenik, nahiz ongi dakidan gauzak usu nahaska agertzen direla. Honen arabera, lehenbizi toponimiari eskainitako ikerketak iruzkindu ditut, hauek baitira alde handiz ugarienak gure aldizkarian. Gero aztergaitzat etxe izenak dituzten idazkiez mintzo naiz, ondoren mota bateko edo besteko pertsona izenez dihardutenez, hurbilena argitaratu diren teonimiaren inguruko bi lanak hartzen ditut solasgai, eta, azkenik, gaitzat onomastika duten liburuen erreseinen berri ematen dut.

Leku izenei eskainitakoak direla eta, gauzak azaltzeko denboran zirt edo zart egin behar bainuen, aurrena lehen lanez ihardukitzea erabaki dut, Mitxelena, Garate eta besterenez, hurrena nafar hiriburuaren gainean argitaratu direnak hartzen ditut mintzagai, ondoren Arabako hiriburuaren euskal izenaren etorkiaz erran direnak, eta jarraian Nafarroako eta Lapurdiko leku izen zenbaiten inguruan jaulki direnak. Lehen atalaren bosgarren puntuan Corominesek gehienbat Iparraldeko toponimo nagusi batzuei buruz bota zituenak aipatzen ditut, laburki betiere, ez baitzen lekurik aski denen xeheki aztertzeko, gero Nafarroako herri izenez Zierbidek ematen dituen azalpenak aztertzen ditut, gainetik behintzat bai. Ondoren xedetzat herri bateko toponimia txikiaren bilketa egitea dutenak aipatzen ditut, herriz gaineko alderdietan egindakoak, zenbait (herri) izenen azalpen etimologikoaz arduratzen direnak, aztergaitzat egungo Euskal Herritik kanpoko leku izenak hartzen dituztenak, erdal kontuez dauden hiru lantxoak, atzizkien inguruko ugariagoak eta, azkenean, “Bestelakoak” izena daramanean, aitzinekoetan sailkatzen neke zirenak ematen ditut.

Bukatzeko erran nahi dut gehienetan nire iritzia ematen saiatu naizela, ukitzen nituen puntuen gainean, sailkatze hutsa egitea ene irudiz ez baitzen aski.